• Registration

 

በዩኒቨርሲቲው የተማሪዎች ህብረት የ"ሊቭ ፎር ጄኔሬሽን" ክበብ ከዩኒቨርሲቲው የምርምርና ማህበረሰብ አገልግሎት ምክትል ፕሬዚደንት ጽ/ቤት ጋር በመተባበር ባሰናዳው በዚሁ ልዩ የበዓል ዝግጅት ለ300 አረጋውያን፣ ወጣቶችና ወላጆቻቸውን ላጡ ህጻናት የምሳ ግብዣ፣ የተለያዩ አልባሳት፣ ሳሙናና ለሰውነት ተስማሚ የሆኑ ቅባቶች ያቀረበላቸው ሲሆን በጸና ችግር ውስጥ እንደሚገኙ ለተለዩት 100 ህጻናት ለእያንዳንዳቸው 5 ደብተሮችና እስክሪብቶዎች በድምሩ 500 ደብተሮችና እስክሪብቶዎች አበርክቶላቸዋል፡፡

በዩኒቨርሲቲው የተማሪዎች ህብረት የክበባት አስተባባሪ ተማሪ ቃልኪዳን ጥላሁንና የ"ሊቭ ፎር ጄኔሬሽን" ክበብ ሰብሳቢ ተማሪ የአብሥራ ገሠሠ እንደተናገሩት የዝግጅቱ ዋና ዓላማ በወቅቱ ከፍ ብሎ የሚታየው ትውልድ አካል የሆኑት የዩኒቨርሲቲው ተማሪዎች ዛሬ ለሚገኙበት ደረጃ የደረሱት አረጋውያን ትናንት በከፈሉት መስዋዕትነት መሆኑን እንደሚገነዘቡትና በችግር ጊዜያቸው ምንጊዜም ከጎናቸው እንደማይለዩ ለመግለጽ መሆኑን አመልክተዋል፡፡

ተማሪዎቹ አክለውም ዛሬ ለተጎዱት ወገኖች የተበረከቱት አልባሳት ሙሉ በሙሉ ከግቢው ተማሪዎች የተገኘና ሁሉም የክበቡ አባላት ከትምህርት ሥራቸው ጎን ለጎን እነዚህን አልባሳት ከማሰባሰብ ጀምሮ አጠቃላይ ዝግጅቱን ለማሳካት በጋራ መንቀሳቀሳቸውን ተማሪ ቃልኪዳንና ተማሪ የአብሥራ ገልጸዋል፡፡ በእለቱ ተማሪዎቹ የአረጋዊያን እግር በማጠብ ያላቸውን አክብሮት አሳይተዋል፡፡

በዓሉን ከአረጋውያኑ ጋር አክብረው የዋሉት በወልቂጤ ዩኒቨርሲቲ የምርምርና የማህበረሰብ አገልግሎት ምክትል ፕሬዚደንት ዶክተር ሲሳይ ሸዋአማረ በበኩላቸው የበዓሉ ዝግጅት ሙሉ በሙሉ በተማሪዎቹ ጥረት የተከናወነ ሆኖ እጅግ ደማቅና ቤተሰበዊ መንፈስ ባለው ሁኔታ የተዘጋጀ በመሆኑ በእጅጉ ተደስተው መዋላቸውን ገልጸዋል፡፡ ዶክተር ሲሳይ አክለውም የክበቡ አባላት ተነሳሽነት ያላቸው፣ ጠንካራና ውጤታማ ተማሪዎች መሆናቸውንና ለትውልድ የመኖርን እሳቤ ከጽንሰ-ሀሳብነቱ ባሻገር እንደመርህ ይዘው በተግባር ለመግለጽ የጸና አቋም ያላቸው በአስተሳሰብም ሆነ በግብራቸው የወልቂጤ ዩኒቨርሲቲን የሰላም አምባሳደርነት ማረጋገጫዎች ናቸው ብለዋል፡፡

የበዓሉ ዝግጅት አሳታፊ በሆኑ በተለያዩ የመዝናኛ ፕሮግራሞች የደመቀ ሲሆን አረጋውያኑ በዓሉን በእጅጉ ተደስተው እንዳሳለፉት ገልጸው ለተማሪዎቹ ምርቃታቸውን ችረዋቸዋል፡፡

Copyright © 2020. Wolkite University. Designed by Wolkite University ICT

Login Form

Register