• Registration

 

ፕሮፌሰር ደጀኔ አየለ በበኩላቸው በዩኒቨርሲቲው ለተመዘገበው ፈጣን እድገት ከፍተኛው ባለድርሻ በየደረጃው የሚገኙት የተቋሙ የአመራር አካላት መሆናቸውን አመልክተው እስካሁን የነበረውን ውጤታማ የስራ ባህል ተጠናክሮ አንዲቀጥል ምክረ-ሀሳባቸውን አቀረቡ፡፡

ፕሮፌሰር ደጀኔ አየለ በዩኒቨርሲቲው የነበራቸው የአመራር ሚና ለተተኪአቸው ለአዲሱ ፕሬዚደንት ለዶክተር ፋሪስ ደሊል  አስረክበው ሲሰናበቱ በተዘጋጀላቸው የሽኝት ሥነ-ሥርዓት ላይ የዩኒቨርሲቲው ምክትል ፕሬዚደንቶች፣ የኮሌጅ ዲኖችና ዳይሬክተሮች እንደተናገሩት ፕሮፌሰር ደጀኔ የተቋሙን መዋቅራዊ አደረጃጀትን ተከትሎ ኃላፊነት ከተጠያቂነት ጋር ማከፋፈል፣ በመግባባት ላይ የተመሠረተ የአመራር ቡድን በመፍጠር አደራጅቶ ማንቀሳቀስ፣ የመምህራንና የሠራተኞችን ጥረት ተከታትሎ አግባብነት ያለው አድገት መስጠትና የሴቶችን ተሳትፎ ማበረታታት  የአንድን ተቋም ራዕይና ተልዕኮ ለማሳካት ቁልፍ ሚና እንዳላቸው በተግባር ያረጋገጡ ባለራዕይ መሪ ናቸው፡፡

 ፕሮፌሰር ደጀኔ በዩኒቨርሲቲው በነበራቸው የአምስት ዓመታት ቆይታ     በሥራ አጋጣሚ በሚንቀሳቀሱበት ጊዜ በአገር ውስጥም ሆነ በውጪ ሀገራት ያገኙት ልምድና የተመለከቷቸው በጎ ነገሮች ሁሉ በተቋማቸው ውስጥ እንዲተገበሩ ለማድረግ የነበራቸው ፍላጎትና ጥረት ዩኒቨርሲቲውን ከአቻዎቹ በተሻለ ደረጃ ላይ ለመገኘት ከቀዳሚዎቹ ተወዳዳሪ ለመሆን አንዳስቻሉት የአመራር አባላቱ ገልጸዋል፡፡ እንዲሁም ፕሮፌሰር ደጀኔ ግልጽ የሆነ የጤና ችግር የነበረባቸው ቢሆንም የተጣለባቸውን አደራ ለመወጣት ችግራቸውን በውስጣቸው በመያዝ ራሳቸውን በዕድሜና በኃላፊነት ደረጃ ሳይገድቡ ሁሉንም በእኩል ደረጃ እንደ ጓደኛ አቅርበው በማስተማር ሲሰሩ የቆዩ ቅን፣ ብልህና ውጤታማ መሪ እንደነበሩ መስክረውላቸዋል፡፡

በመሆኑም በሁለቱ መካከል በተከናወነው መልካም አርአያነት ያለው የአመራር ቅብብሎሽ መሠረት በማድረግ አዲሱ ፕሬዚደንት ዶክተር ፋሪስ ደሊል በፕሮፌሰር ደጀኔ የአመራር ዘመን የተመዘገበውን ተከታታይነት ያለው ፈጣን እድገት በዘላቂነት ለማስቀጠል የገቡትን ቃል ለማሳካት በየደረጃው ያለው አመራር ከጎናቸው ሆኖ የሚጠበቅበትን ኃላፊነት ይወጣል ብለዋል፡፡

የቀድሞው ፕሬዚደንት ፐሮፌሰር ደጀኔ በበኩላቸው በወልቂጤ ዩኒቨርሲቲ ለተመዘገበው ፈጣን እድገት ትልቁ ባለድርሻ በየደረጃው የሚገኘው አመራርና ማህበረሰቡ መሆኑን አመልክተው የተቋሙ እድገት የተገኘው ሁሉም በየኔነት ስሜት ተንቀሳቅሶ በመሥራቱ ነው ብለዋል፡፡

እንደ ፕሮፌሰር ደጀኔ ገለጻ የዩኒቨርሲቲው አመራርነት በተቀበሉበት ወቅት የነበሩትን ውስጣዊና ውጫዊ ችግሮች በመፍታት ተቋሙ አሁን ያለበትን ደረጃ ሊደርስ የቻለው ትክክለኛ የአመራር ሥርዓት ለመፍጠር በተወሰደው እርምጃ ነው፡፡ በመሆኑም አንዳንድ ችግሮች በሚከሰቱበት ጊዜ ወዲያውኑ በመፍታት አሁን ያለው የአመራር ሥርዓት ይበልጥ አጠናክሮ መቀጠል እንደሚገባ መክረዋል፡፡ እንዲሁም ከፕሬዚደንት ዶክተር ፋሪስ ጋር ተገቢውን የአመራር ቅብብሎሽ ማድረጋቸውንና ካላቸው ቅን አስተሳሰብና የአመራር ልምድ አንጻር ተቋሙን ወደተሻለ ደረጃ እንደሚያሸጋግሩት ያላቸውን እምነት ገልጸዋል፡፡   

        

Copyright © 2020. Wolkite University. Designed by Wolkite University ICT

Login Form

Register