• Registration

 

ወልቂጤ ዩኒቨርሲቲ በጉራጌ ዞን ከተለያዩ የህብረተሰብ ክፍሎች ለተውጣጡ አካላት የኢንፎርሜሽን ኮሙኒኬሽን ቴክኖሎጂ እውቀታቸውን የሚያዳብር የዲጂታል መሰረተ ትምህርት (Digital Literacy) ስልጠና በመስጠት ላይ ይገኛል፡፡

የኢፌድሪ ሳይንስና ከፍተኛ ትምህርት ሚኒስቴር በ3ኛው ዙር አንድ መቶ ቀናት ከ50 ሺህ በላይ ለሚሆኑ የህብረተሰብ ክፍሎች የዲጂታል መሰረተ ትምህርት (Digital Literacy) ስልጠና መርሃ ግብር በመንደፍ የህብረተሰቡ የኢንፎርሜሽን ኮሙኒኬሽን ቴክኖሎጂ እውቀት ለማዳበር የሚያስችል ስልጠና ለመስጠት አቅዶ በመንቀሳቀስ ላይ ይገኛል፡፡

በስልጠናው ላይ በወልቂጤ ዩኒቨርሲቲ የኮምፒውቲንግ እና ኢንፎርማቲክስ ኮሌጅ ዲን አቶ ኮርአብዛ ሸዋረጋ እንደገለፁት አለም ወደ ዲጂታል ቴክኖሎጂ በተቀየረችበት በአሁኑ ወቅት ከቴክኖሎጂው ጋር አብሮ የሚራመድ ትውልድ መፍጠር የግድ ይላል፡፡

አቶ ኮራአብዛ አክለውም ሀገራችን በዘርፉ ያላት እውቀትና ልምድ በማሳደግ በቴክኖሎጂ የተደገፈ አገልግሎት ለማህበረሰቡ ተደራሽ ማድረግ እንደሚገባ ተናግረው የዲጂታል መሰረተ ትምህርት ስልጠናው የህብረተሰቡ የኢንፎርሜሽን ኮሙኒኬሽን ቴክኖሎጂ እውቀት ለማዳብር እንደተዘጋጀ ገልፀዋል፡፡

ስልጠናው በመሠረታዊ የኮምፒዩተር ክህሎት፣ በአለም አቀፍ የመረጃ መረብ አጠቃቃም፣ በአገልግሎት ሰጪ መተግበሪያ ፕሮግራሞች አጠቃቀም፣ በኮምፒወተር ሚስጥራዊነትና መረጃ አያያዝ እና በዲጂታል የአኗኗር ዘይቤ በሚሉ ርዕሰ ጉዳዮች ዙሪያ በተግባር ተደግፎ የሚሰጥ ነው ብለዋል፡፡

የሠራተኞችን የቴክኖሎጂ አጠቃቀም ችሎታ ለማሳደግ ስልጠናው ጉልህ ሚና እንደሚኖረው የተናገሩት የኮሌጁ ዲን በየመስሪያ ቤቱ በቴክኖሎጂ የተደገፈ ቀልጣፋ አገልግሎት እንዲኖር በማድረግ ረገድም የራሱን እሴት እንደሚጨምር ተናግረዋል፡፡

ስልጠናውን እየተከታተሉ የሚገኙ ሰልጣኞች በሰጡት አስተያየት በስልጠናው አዳዲስ እውቀቶችን በማግኘት የኮምፒውተር አጠቃቀም ችሎታቸውን ለማሳደግ እንደሚጠቅማቸውና በስራው አለምም በቴክኖሎጂ የተደገፈ ቀልጣፋ አገልግሎት ለመስጠት እንደሚያግዛቸው ተናግረዋል፡፡

በዲጂታል መሰረተ ትምህርት ስልጠናው ከጉራጌ ዞን ከተለያዩ የህብረተሰብ ክፍሎች የተውጣጡ 1500 ሠልጣኞች በሶስት ዙር እንደሚሳተፉ የተገለፀ ሲሆን በመጀመሪያ ዙርም 500 ሰልጣኞች ለአምስት ተከታታይ ቀናት ስልጠናውን በሚገባ ተከታትለው አጠናቅቀዋል፡፡

Copyright © 2019. Wolkite University. Designed by Wolkite University ICT

Login Form

Register