• Registration

 

ወልቂጤ ዩኒቨርሲቲ ለሳይንስና ቴክኖሎጂ ትምህርቶች በቂ የሆነ የቤተሙከራ ግብአቶችን በማሟላት ላይ እንደሚገኝ ተግልጿል፡፡

ተማሪ ተክለ ዩሃንስ አቡኔ  የአርባ ምንጭ ዩኒቨርሲቲ የሶስተኛ አመት የምግብ ማቀነባበር ትምህርት ዘርፍ ተማሪ ነው፡፡ እሱና የክፍል አጋሮቹ ከ 3 መቶ ኪሎ ሜትሮች በላይ አቋርጠው ወልቂጤ ዩኒቨርሲቲ በመምጣት የተግባር ትምህርታቸውን ሲከታተሉ ነው ያገኘናቸው፡፡

 ተማሪ ተክለ ዩሃንስ እንደሚለው ዩኒቨርሲቲዎች ተማሪዎቻቸው ብቁና ውጠየታማ እንዲሆኑ ከንድፈ ሃሳብ ትምህርት በተጨማሪ በተግባር የተደገፈ ትምህርት እንዲያገኙ በቂ የሆነ የግብአትና የሰለጠነ የሰው ሃይል ማሟላት ይገባቸዋል ፡፡

የምህንድስና ትምህርት ዘርፎች ከሀምሳ በመቶ በላይ በተግባር የተደገፈ ትምህርት ስለሚያስፈልጋቸው በሀገር አቀፍ ደረጃ ልዩ ትኩረት ሊሰጠው እንደሚገባ የሚናገረው ተማሪ ተክለ ዩሃንስ  ሌሎች ዩኒቨርሲቲዎች የወልቂጤ ዩኒቨርሲቲን መልካም ተግባር በመከተል ተማሪዎቻቸውንና ተቋማቸውን ለተሸለ ውጤት ማብቃትና  አላስፈላጊ የሆኑ የጊዜ የገንዘብና የጉልበት ወጪዎችን ማስቀረት እንደሚኖርባቸው ጨምሮ ግልጿል፡፡

በአርባ ምንጭ ዩኒቨርሲቲ የምግብ ምህንድስና መምህርት  መአዛ ግዛው በበኩላቸው አርባ ምንጭ ዩኒቨርሲቲ የምግብ ምህንድስና ትምህርት ከጀመረ ሶስተኛ አመቱን ቢያስቆጥርም  ተቋሙ ተማሪዎቹን የተግባር ትምህርት መማሪያ ግብአቶች በለማግኘታቸው ተማሪዎቹን ወደ ወልቂጤ ዩኒቨርሲቲ በማምጣት ተግባር ትምህርት እንዲከታተሉ እያደረገ መሆኑን ገልጸው በኢትዮጵያ የሚገኙ ከፍተኛ የትምህርት ተቋማት ተማሪዎቻቸው በአለም አቀፍ ደረጃ ተወዳዳሪ የሚያደርጋቸውን ክህሎት እንዲያገኙ ዘመኑ የሚጠይቃቸው የመማሪያ ግብአቶች ሊሟሉ እንደሚገባ  መምህርቷ አሳስበዋል፡፡

መምህርቷ አያይዘውም መንግስት ለከፍተኛ የትምህርት ተቋማት የሰጠውን ትኩረት በማጠናከርና በምርምር የሚገኙ ቴክኖሎጂዎችን ለማህበረሰቡ ተደራሽ እንዲሆኑ በማደረግ በየዘርፉ ፈጣን የሆነ ለውጥ ማምጣት እንደሚቻል ተናግረዋል፡፡

በወልቂጤ ዩኒቨርሲቲ የማእከላዊ ቤተሙከራ ዳይሬክተር መምህር ሸምሱ ሊጋኒ እንደተናገሩት የሳይንስና ቴክኖሎጂ ተማሪዎች የተግባር ትምህርታቸውን እንዲከታተሉ ለማድረግ ዩኒቨርሲቲው ከተመሰረተ ጊዜ ጀምሮ  ሰፊ ስራ  በመስራቱ በአሁኑ ሰአት በቂ በሚባል ሁኔታ ቤተሙከራዎችን ማሟላት ተችሏል ብለዋል፡፡

 በ2010  የትምህርት ዘመንም ዩኒቨርሲቲው ከ አንድ ነጥብ አምስት ሚሊየን ብር በላይ ለተግባር ትምህርት መማሪያ ወጪ ማድረጉን ጠቁመዋል፡፡

በ2011 ትምህርት ዘመን የኬሚካል፡ የኤሌክተሪካልና የእንስሳት ርባታ ትምህርት ክፍል ተማሪዎች የተግባር ትምህርታቸውን በሌሎች ዩኒቨርሲቲዎች እንዲከታተሉ ለማድረግ ከ 9 መቶ ሺህ ብር በላይ ወጪ መደረጉን ጨምረው ገልጸዋል፡፡

ይሁን እንጂ በ2011 የትምህርት ዘመን ቤተሙከራዎች  በበቂ ሁኔታ በማደራጀታቸው ከ 3ሚሊየን ብር በላይ ወጪ ማዳን መቻሉንና አገልግሎት ለማግኘት ከመጡ ዩኒቨርሲቲዎች ከ2 ነጥብ 2 ሚሊየን ብር በላይ ገቢ ማግኘት መቻሉን ተናግረዋል፡፡

በቀጣይም  ለኬሚካል ለኤሌክትሪካልና ለእንስሳት እርባታ ትምህርት ክፍል ተማሪዎች የቤተ ሙከራ  ግብአቶችን ለማሟላት በትኩረት እየተሰራ መሆኑን ገልጸው የግብአት የአቅርቦት ችግር ካላጋጠመ በ2012  የትምህርት ዘመን ሁሉም የትምህርት ክፍሎች ለተግባር ትምህርት ወደተለያዩ አካባቢዎች  የሚያደርጉት ጉዞ እንደሚቀር  ተናግዋል፡፡

አክለውም ለቤተ ሙከራ ግዢ የሚመደቡ በጀት በአግባቡ አለመምራት፤ለተበላሹ ማሽኖች ጥገና የሚመደብ በጀት አለመኖሩ እንዲሁም የግዢ ስርአቱ አስቸጋሪ መሆን ግብአቶችን በወቅቱ ለማሟላት አስቸጋሪ እንደሚሆንባቸው ገልጸዋል ፡፡

የዩኒቨርሲቲው የግዢና ንብረት አስተዳደር ዳይሬከተር አቶ ክበበው ወርቅነህ በበኩሉ ችግሮቹ እያጋጠሙ ያሉት ግዢ ጠያቂዎች በእቅድ ያለመመራት፤ የበጀት እጥረት ፤የእቃዎችን ቴክኒክ ዝርዝር በአግባቡ አለማቅረብና የትራንሰፖርት እጥረት እንዲሁም አቅራቢዎች የተፈለገውን እቃ በጊዜና ጥራቱን በጠበቀ መልኩ አለማቅረብ የችግሩ ምንጭ መሆናቸውን ገልጸው በቀጣይ ችግሮቹን ለመፍታት ከሚመለከታቸው አካላት ጋር በቅንጅት  ይሰራል ብለዋል ፡፡    

  

Copyright © 2019. Wolkite University. Designed by Wolkite University ICT

Login Form

Register